ინტერვიუ თბილისის საპატრიარქოს კლინიკის “პაციენტთა საბჭოს” თავმჯდომარე მადინა გოცირიძესთან
საქართველოს ისტორიაში პირველად საავადმყოფოებში “პაციენტთა და ოჯახის წევრთა საბჭოები” იქმნება.
“საზოგადოებრივი ჯანდაცვის ინსტიტუტისა” (PHIG) და “აკრედიტაცია კანადის” თანამშრომლობით ჩამოყალიბდა “საქართველოს პაციენტთა საბჭოების სამდივნო”, რაც პაციენტთა აქტიური ჩართულობის სტრუქტურირებული, მდგრადი და კულტურულად სენსიტიური პლატფორმის შექმნის მნიშვნელობას უსვამს ხაზს. ინიციატივა მოიცავს 20 “პაციენტთა და ოჯახის წევრთა მრჩეველთა საბჭოს” (PFAC) მხარდაჭერას, რომლებიც მთელი საქართველოს მასშტაბით სხვადასხვა კლინიკაში ფუნქციონირებენ.
რა არის პაციენტთა საბჭოების სამდივნო?
პაციენტთა საბჭოების სამდივნო წარმოადგენს ცენტრალიზებულ ორგანოს, რომელიც მხარს უჭერს პაციენტთა და ოჯახის წევრთა მრჩეველთა საბჭოების (PFAC) შექმნას, ფუნქციონირებას და ეფექტიანობას. ეს საბჭოები საშუალებას აძლევენ პაციენტებს და ოჯახებს, აქტიურად ითანამშრომლონ ჯანდაცვის მომსახურების მიმწოდებლებთან და მენეჯმენტთან, პაციენტთა საჭიროებებისა და შეხედულებების გათვალისწინებით.
აღნიშნული ინიციატივის ფარგლებში პაციენტთა საბჭო შეიქმნა საპატრიარქოს წმ. იოაკიმეს და ანას სამედიცინო ცენტრშიც, რომლის თავმჯდომარეც მადინა გოცირიძე გახლავთ, რომელთან ინტერვიუსაც pacienti.ge გთავაზობთ:
– ქალბატონო მადინა, რატომ მიიღეთ გადაწყვეტილება, ჩართულიყავით პაციენტთა საბჭოს საქმიანობაში?
– გადაწყვეტილება, რომ გავმხდარიყავი პაციენტთა საბჭოს წევრი, ემყარება სურვილს, ვიყო აქტიური მონაწილე ჯანდაცვის სისტემის გაუმჯობესებაში და მივეხმარო სხვა პაციენტებს.
– რას გულისხმობთ სხვა პაციენტების დახმარების სურვილში?
– პაციენტთა საჭიროებების დაცვას და მხარდაჭერას – მჯერა, რომ პაციენტების ხმა ხშირად იგნორირებულია. საბჭოში ყოფნით, მექნება საშუალება, დავიცვა მათი ინტერესები, გავაძლიერო მათი უფლებები და შევიტანო წვლილი გადაწყვეტილებების მიღებაში, რაც პირდაპირ გავლენას მოახდენს მათ კეთილდღეობაზე.
ასევე, პირადი გამოცდილება – როგორც პაციენტის ან პაციენტთან დაკავშირებული ადამიანისა, ჩემი გამოცდილება მაძლევს უნიკალურ პერსპექტივას. მსურს, რომ ჩემი გადატანილი სიტუაციები გამოვიყენო სხვა ადამიანების დასახმარებლად და ჯანდაცვის სერვისების ხარისხის ასამაღლებლად.
– რა როლი აქვს თქვენს გადაწყვეტილებაში სოციალურ და საზოგადოებრივ პასუხისმგებლობას?
– მჯერა, რომ ყველამ, ვისაც აქვს შესაძლებლობა, უნდა მიიღოს მონაწილეობა საზოგადოებისთვის მნიშვნელოვან პროცესებში. პაციენტთა საბჭო არის პლატფორმა, რომელიც მაძლევს საშუალებას, აქტიურად ჩავერთო ჯანდაცვის პოლიტიკის განვითარებაში და ხელი შევუწყო სისტემის სანდოობას.
გადამწყვეტად მნიშვნელივანია თანამშრომლობის შესაძლებლობაც –
პაციენტთა საბჭო ქმნის გარემოს, სადაც სხვადასხვა ფენის ადამიანებს შორის დისკუსია და თანამშრომლობა შესაძლებელია. ეს აძლიერებს ინკლუზიურობას და ქმნის უკეთეს გადაწყვეტილებებს.
ამიტომ, ჩემი მოტივაცია არის ადამიანებზე ზრუნვა, ჯანდაცვის სისტემის განვითარებაში წვლილის შეტანა და სამართლიანი გარემოს შექმნა ყველა პაციენტისთვის.
